DVD Friese Waterlinie
Een kotte trailor van de film bekieken kan onderan disse websiede.
De Stellingwarver tiedelike filmploeg Streek in Beeld het aende oktober et Docudrama De Friese Waterlinie in premiere laoten gaon.
53 volwassenen en kiender die mitwarkt hebben an disse amateur streek-produktie weren daorbi’j anwezend in kefe-restaurant Boszicht in Ni’jberkoop. Elkeniene die op iene of aandere menier mitwarkt het, kreeg de film op DVD van de filmploeg.
Hoofdrolspeulers bin Karst Berkenbosch (verteller), Jelke Nijboer (Hans Willem van Aylva) en Teake Draaier (Bommen Berend).
Veerder warkten o.e. mit: kiender van Berkoop en van Steggerde, bewoners van langs de Waeterlinie, Bob en Elma de Vries, Annamarie Thomas, streekhistoricus Geert Lantinga, de oolde laandmeter Kees Stuurman, schriever Piet Bult, Laandschopsbeheer Frieslaand, It Fryske Gea, en Titia Bijwaard as ‘voice-over’.
De film verhaelt over et gebeuren rondomme de Friese Waeterlinie / Lende-Kuunder-Linie as verdedigingswark in de Tachtigerjaorige oorlog tegen de Spanjaorden en in 1672-1673 tegen Bommen Berend, de oorlogszochtige bisschop van Münster. En dat niet alliend as fiktie- en non-fiktieverhael, mar ok edukatief is dit filmprodukt de muuite weerd.
De film is op en top een echt Stellingwarver streekprodukt, niet alliend handelt et historische gebeuren veural in de Stellingwarven en gaot et om de schaanzen hiere, mar bin de meerste opnaemen ok opneumen in dit gebied en bin et allemaole Stellingwarvers die mitwarkt hebben.
De Historische Verening Makking e.o. (HvM) het veur de filmploeg vergeerderruumte beschikber steld en daorveur konnen ok wi’j een DVD ofhaelen. Daornaost bin goenend van de HvM in de filmploeg zels drok west, as filmer, as ‘angever’ van et idee en zels as regisseur en filmmonteur, dus de betrokkenhied van HvM-leden bi’j dit filmprodukt was groot. Et perjekt Streek in Beeld is trokken deur de Vereniging Historie Weststellingwerf en daor bin de DVD’s ok te kope, kiek bi’j www.historieweststellingwerf.nl
De DVD gelt €10,= + verzendkosten.
Dit e-mailadres wordt beveiligd tegen spambots. JavaScript dient ingeschakeld te zijn om het te bekijken.